Стартаваў конкурс інвестпраектаў для малога і сярэдняга бізнесу

Прадстаўнікі малога і сярэдняга бізнесу Віцебскай вобласці – кліенты Белгазпрамбанка – могуць прэтэндаваць на дадатковае фінансаванне ў рамках конкурсу інвестыцыйных і бізнес-праектаў.

Камітэт эканомікі Віцебскага абласнога выканаўчага камітэта аб'явіў аб прыёме заявак ад суіскальнікаў дадатковага фінансавання з ліку прадстаўнікоў рэгіянальнага бізнесу. Згодна з умовамі конкурсу суб'екты малога і сярэдняга бізнесу Віцебскай вобласці ў тэрмін да 15 ліпеня 2026 года уключна могуць звярнуцца па субсідыі для кампенсацыі часткі працэнтаў за карыстанне банкаўскімі крэдытамі, а таксама  для кампенсацыі часткі расходаў на выплату лізінгавых плацяжоў па дагаворах фінансавай арэнды (лізінгу) у частцы аплаты сумы ўзнагароджання (даходу) лізінгадаўца.

Прыярытэтнымі напрамкамі дзейнасці прэтэндэнтаў павінны быць стварэнне, развіццё і пашырэнне вытворчасці прадукцыі, тавараў, выканання работ і аказання паслуг; арганізацыя і развіццё вытворчасці, а таксама рэалізацыя экспартаарыентаванай і імпартазамяшчальнай прадукцыі; вытворчасць прадукцыі, накіраванай на энерга- і рэсурсазберажэнне; укараненне новых тэхналогій.

Дакументы на ўдзел у конкурсе бяруць у камітэце эканомікі Віцебскага аблвыканкама (г.Віцебск, вул.Гогаля, 6, каб. 314). Больш падрабязную інфармацыю можна атрымаць па тэлефонах 8 (0212) 22 63 12, 8 (0212) 22 63 16.