19 студзеня на сцэне Нацыянальнага акадэмічнага тэатра імя Янкі Купалы па выніках 2014 года ўзнагароджвалі мецэнатаў беларускай культуры.
За значны ўклад у развіццё культуры ганаровага дыплома атрымала ААТ «Белгазпрамбанк». Акрамя таго, за асабісты ўклад у развіццё і дабрачынную падтрымку беларускай культуры быў персанальна узнагароджаны старшыня праўлення Белгазпрамбанка Віктар Бабарыка.
Ініцыятарам акцыі стала Міністэрства культуры Рэспублікі Беларусь. Званне «Мецэнат культуры», якое ў гэтым годзе ўпершыню прысвойваецца ў нашай краіне, ва ўрачыстай абстаноўцы атрымалі прадстаўнікі 43 арганізацый – за 2014 год яны аказалі спонсарскую дапамогу ўстановам культуры на суму больш за 50 млрд. рублёў. Дзякуючы гэтай дапамозе тэатры і музеі змаглі ажыццявіць свае праекты, арганізаваць выставы, адправіцца на гастролі. Годных ганаровага тытула вызначыла журы, у якое ўвайшлі самі прадстаўнікі культурнай сферы.
Сярод найбольш яркіх прыкладаў супрацоўніцтва дзяржавы і бізнесу ў 2014 годзе дзеячы культуры назвалі выставу «Дзесяць стагоддзяў мастацтва Беларусі» і Міжнародны форум тэатральнага мастацтва «ТЭАРТ», якія прайшлі пад эгідай Белгазпрамбанка. У сваім выступе старшыня праўлення Белгазпрамбанка Віктар Бабарыка павіншаваў прысутных на цырымоніі з тым, што «Міністэрства культуры і бізнес працягваюць праводзіць шматстайную палітыку для таго, каб культура Беларусі расла, квітнела і цешыла ўсіх навакольных».
