Пачынаючы з 30 лістапада 2014 года, кожную нядзелю, услед за літоўскім тэлеканалам «Культура», віленскі канал Penki TV будзе дэманстраваць фільмы дакументальнага цыкла «Мастакі Парыжскай школы. Ураджэнцы Беларусі».
У кожнай з серый раскрываецца жыццё і творчасць аднаго з мастакоў: Марка Шагала, Хаіма Суціна, Леона Бакста, Надзі Хадасевіч-Лежэ, Міхаіла Кікоіна, Восіпа Любіча і Файбіша-Шрагі Царфіна. У фільмах маштабна паказана карпаратыўная калекцыя «Белгазпрамбанка», якая налічвае больш за 60 твораў мастацтва.
– Наш праект – гэта дакументальны адукацыйна-асветніцкі цыкл, разлічаны на шырокую аўдыторыю,– кажа адзін з яго стваральнікаў журналіст Алег Лукашэвіч. – Мы спадзяемся, што пасля знаёмства з фільмам літоўскія гледачы адкрыюць для сябе зусім новы пласт беларускай культуры.
З 11 верасня па 9 лістапада гэтага года ў Літоўскім мастацкім музеі (Вільнюс) прайшла выстава «Мастакі Парыжскай школы – ураджэнцы Беларусі», якую наведалі больш 12 000 гледачоў. Выстава мела шырокі рэзананс у культурным жыцці Вільні. Дарэчы, менавіта яна адкрывала Дні культуры Беларусі ў Літоўскай Рэспубліцы. Па прызнанні арганізатараў, у апошнія выхадныя перад закрыццём на экспазіцыю прыйшлі паглядзець каля двух тысяч чалавек, а час працы галерэі нават прыйшлося падаўжаць на некалькі гадзін.
Па завяршэнні віленскай выставы яе арганізатары апублікавалі наступныя дадзеныя. З ліку наведвальнікаў больш за 600 былі школьнікамі, больш за 1000 – пенсіянерамі, амаль 800 – замежнікамі, 226 – людзьмі з абмежаванымі магчымасцямі. Усяго было праведзена 60 экскурсій, у якіх прынялі ўдзел 1330 чалавек.
Цікава, што за два месяцы выставу ў Вільні наведаў прыкладна такі ж адсотак насельніцтва і гасцей горада (каля 2,5 %), як за чатыры месяцы правядзення той жа выставы ў Мінску ў 2012-2013 гг.
Як адзначалі прафесійныя крытыкі, у экспазіцыі можна было ўбачыць шмат такіх твораў, якія да гэтага экспанаваліся даволі рэдка – напрыклад, раннія або пазнейшыя працы мастакоў Парыжскай школы – ураджэнцаў Беларусі.
Нядаўна калекцыя жывапісных, графічных і скульптурных работ са збору «Белгазпрамбанка» вярнулася ў Беларусь і ў хуткім часе ў рамках маючых адбыцца выстаў з ёю, але ўжо значна абноўленай і дапоўненай новымі творамі, зноў змогуць азнаёміцца беларускія знатакі мастацтва.
