"Белгазпрамбанк" у верасні абяцае паказаць калекцыю работ беларускіх мастакоў "Парыжскай школы", якая ўключае і знакавыя для сусветнай і нацыянальнай культуры імёны – Марка Шагала і Хаіма Суціна, якія нарадзіліся і выраслі на тэрыторыі цяперашняй Беларусі.
"У Парыжскім Вуллі, дзе тварылі гэтыя мастакі, вісіць шыльда з удзячнасцю французскай грамадскасці мастакам, якія ўнеслі значны ўклад у сусветнае мастацтва. Дык вось, з чатырох прозвішчаў, названых на гэтай таблічцы – тры з паловай беларускія. Тры з паловай, таму што там пазначаны імёны Марка Шагала, Хаіма Суціна, Восіпа Цадкіна і Фернана Лежэ, які быў жанаты на Надзі Хадасевіч-Лежэ", – паведаміў старшыня праўлення ААТ "Белгазпрамбанк" Віктар Бабарыка.
"Я лічу, што гэта трагедыя Беларусі, што ні адной працы гэтых мастакоў, якія складаюць славу мастацкай цывілізацыі чалавецтва, не было ў нашай краіне. Таму мы набылі ў мінулым і ў гэтым годзе не толькі Шагала і Суціна", – растлумачыў прычыну стварэння калекцыі В. Бабарыка.
"Фонд Белгазпрамбанка складае больш за 30 работ гэтых мастакоў – і сярод іх арыгінальныя працы Марка Шагала і Хаіма Суціна. Такі калекцыі, па паўнаце і разнастайнасці, не існуе не толькі ва Усходняй Еўропе, але і ў Еўропе наогул. Буйней толькі калекцыі ў Ізраілі, і ў ЗША, і тое трэба яшчэ падумаць", – сказаў кіраўнік банка.
Ён паабяцаў, што "ў верасні пройдзе выстава гэтай калекцыі, якая складаецца з калекцыі Белгазпрамбанка і іншых прыватных калекцый, не толькі з Беларусі".
Па словах В. Бабарыка, праект стварэння музея прыватных калекцый, аснову якога складуць мастакі "Парыжскай школы" беларускага паходжання, "падтрымліваюць, ухваляюць і натхняюць нашы асноўныя акцыянеры – Газпром " і "Газпромбанк".
Ён таксама распавёў, што працы мастакоў "Парыжскай школы" на сённяшні дзень можна купляць на міжнародных аўкцыёнах па цане ад 3 тысяч еўра і "да бясконцасці". У прынцыпе, "гэта даступна вялікай колькасці калекцыянераў, у тым ліку, магчыма, беларускіх, і мы спадзяемся, што наш праект выйдзе за межы Белгазпрамбанка", – адзначыў В. Бабарыка.
Марк Шагал (1887-1985) і Восіп Цадкін (1890-1967) нарадзіліся ў Віцебску. Ураджэнкай Віцебшчыны была таксама мастачка Надзя Хадасевіч-Лежэ, жонка вядомага французскага авангардыста Фернана Лежэ. Хаім Суцін (1893-1943) нарадзіўся ў вёсцы Смілавічы Мінскай губерні. Сярод насельнікаў Вулля былі Лежэ, Мадзільяні, Шагал, Суцін, Цадкін, Архіпенка, Нюренберг, Крэмень і іншыя. У цяперашні час Вулей застаецца жылым і артыстычным комплексам.