22 сакавіка, Мінск /Ганна Кот - БЕЛТА/. Стаўкі па крэдытах для рэальнага сектара Беларусі ў бліжэйшы час могуць зніжацца хутчэй ставак па дэпазітах. Такое меркаванне выказаў сёння журналістам старшыня праўлення ААТ "Белгазпрамбанк" Віктар Бабарыка, перадае карэспандэнт БЕЛТА.
Віктар Бабарыка прагназуе, што стаўкі па крэдытах для рэальнага сектара Беларусі будуць зніжацца. "Беларуская эканоміка і беларускія банкі маюць патрэбу ў разгортванні крэдытавання ў беларускіх рублях. Таму канкурэнцыя за крэдытаванне ў беларускіх рублях рэальна жорсткая. Гэта можа прывесці да таго, што стаўкі па крэдытных рэсурсаў будуць зніжацца ледзь-ледзь хутчэй, чым па дэпазітах. Думаю, гэта найбольш верагодны сцэнар", - адзначыў ён.
Разам з тым, банкір сумняваецца ў тым, што стаўка рэфінансавання на канец года зможа скласці 15% гадавых.
Віктар Бабарыка пазітыўна ацаніў дзеянні ўрада і Нацыянальнага банка ў 2012 годзе і пачатку 2013 года. Разам з тым, па яго думку, у 2013 годзе варта працягнуць такую ж асцярожную палітыку, асабліва гэта тычыцца стымулявання развіцця эканомікі. Эксперт лічыць, што крыніцамі развіцця павінны, у першую чаргу, быць канкурэнтаздольная беларуская прадукцыя, экспарт, прыватызацыя, а не зніжэнне працэнтных ставак, "танныя грошы".